Plantun de Prouvènço

Pèr coumpara dos planto d'encò nostre

Pimpinella saxifraga & Plumbago europaea

Princineto

Pimpinella saxifraga

Apiaceae Umbelliferae

Àutri noum : Pimpinello, Erbo-de-la-pimpinello, Pèd-de-menoun.

Noms en français : Boucage saxifrage, Petit boucage.

Descripcioun :
La princineto o peréu pimpinello, de pas counfoundre emé la pimpinello Sanguisorba minor (Rosaceae), se recounèis, de primo, à si fueio divisado-penado (fotò). Es uno planto pas forço grando emé d'oumbello de flour blanco à (7)9 à 16(26) rai sènso bratèio. Lou fru èi redoun (fotò).

Usanço :
Li fru soun couneigu pèr faire veni lou la.

Port : Erbo
Taio : 0,2 à 0,6 m
Fueio : coumpausado
Tipe bioulougico : Emicriptoufite
Cicle bioulougico : Planto renadivo

Gènre : Pimpinella
Famiho : Apiaceae
Famiho classico : Umbelliferae

Ordre : Apiales

Coulour de la flour : Blanco
Petalo : 5
Ø (o loungour) flour : 3 mm
Flourido : Estiéu

Sòu : Ca
Autour basso e auto : 0 à 2200 m
Aparado : Noun
Juliet à avoust

Liò : Roucas - Esboudèu - Tepiero seco - Bos clar
Estànci : Subremediterran à Subaupen
Couroulougi : Éurasiatico
Ref. sc. : Pimpinella saxifraga L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.